ပန်းချီဆရာ ၆၀ နီးပါးဖြင့် ချိတ်ဆက်ထားသော မြန်မာနိုင်ငံ၏ ပထမဆုံး ပန်းချီကား ၀န်ဆောင်မှု လုပ်ငန်းတစ်ခုကို ပန်းချီဆရာငါးဦးက စုပေါင်းအကောင်အထည် ဖော်လျက်ရှိကြောင်း သိရသည်။

 

နိုင်ငံတကာတွင် ဆောင်ရွက်လျက်ရှိသော ပန်းချီကား ၀န်ဆောင်မှု လုပ်ငန်းအသွင်ကို ရယူထားသော်လည်း ယခု မြန်မာနိုင်ငံအတွင်း ဆောင်ရွက်သည့် ၀န်ဆောင်မှုလုပ်ငန်းမှာမူ စီးပွားရေးလုပ်ငန်း အသွင်တစ်ရပ်ထက် ပန်းချီလောကအတွင်း လိုအပ်ချက်က်ို ၀င်ဖြည့်သည့် အနေအထား တစ်ခုသာ ဖြစ်သည်ဟု အဆိုပါ ၀န်ဆောင်မှုလုပ်ငန်းတွင် ပါဝင်လျက်ရှိသူ ပန်းချီဆရာ ဦးလှထွန်းက ပြောသည်။

 

“အဓိကတော့ ပန်းချီဆရာနဲ့ ၀ယ်လက်တို့ နှစ်ဦးနှစ်ဖက် အဆင်ပြေအောင် လုပ်ပေးတဲ့ သဘောပါ။ အဲဒီလို တွေ့ပေးတဲ့အတွက် ပန်းချီအကြောင်း နားမလည်တဲ့သူတွေ အနေနဲ့လည်း အရည်အသွေး ညံ့တဲ့ ပစ္စည်းမျိုး ၀ယ်မိတာမျိုးလည်း မရှိတော့ဘူးပေါ့။ ၀ယ်ချင်တဲ့သူ ဆက်သွယ်လာရင် ကျွန်တော်တို့ အနေနဲ့ ဘယ်ပန်းချီဆရာက ဘယ်အပိုင်း ကျွမ်းကျင်တယ် စသဖြင့် အကြံဥာဏ်ပေးတာမျိုးလည်း လုပ်ပေးပါတယ်” ဟု ၎င်းက ဆိုသည်။

 

၎င်းတို့အနေဖြင့် ပန်းချီဆရာနှင့် ၀ယ်လက်တို့အား တိုက်ရိုက် တွေ့ပေးခြင်းဖြစ်ပြီး၊ အဓိကအားဖြင့် ဟိုတယ်များ၊ မိုတယ်များ၊ ရုံးခန်းများနှင့် လက်ဆောင် ပေးလိုသူများအတွက် ရည်ရွယ်သည်ဟု ဆိုသည်။

 

အဆိုပါ ၀န်ဆောင်မှု လုပ်ငန်းတွင် ပန်းချီဆရာများ၏ လက်ရာမူကြမ်းများအား စုဆောင်းထားရှိပြီး ၀ယ်သူအကြိုက် နှစ်သက်ရာ ပန်းချီဆရာထံသို့ ပို့ပေးကြောင်း၊ ၀န်ဆောင်ခ အနေဖြင့် ၀ယ်သူဘက်မှ မယူဘဲ၊ ရောင်းချသူ ပန်းချီဆရာထံမှသာ ၁၀ ရာခိုင်နှုန်းမှ ၂၀ ရာခိုင်နှုန်းအကြား ယူကြောင်း ဦးလှထွန်းက ပြောသည်။

 

ယင်းကဲ့သို့ ပန်းချီကား ၀န်ဆောင်မှုလုပ်ငန်း ပေါ်ပေါက်လာခြင်းအပေါ် ထင်ရှားသည့် ပန်းချီဆရာ တစ်ဦးဖြစ်သူ ငြိမ်းချမ်းဆုကလည်း ပန်းချီဆရာများ အနေဖြင့် ဈေးကွက်အတွင်း ကိုယ်တိုင် ဈေးကွက်ရှာဖွေရန်မှာ မဖြစ်နိုင်ကြောင်း၊ ထိုသို့ ပန်းချီကား လုပ်ငန်းများသည် နိုင်ငံတကာတွင်လည်း ရှိနေသောကြောင့် ဈေးကွက်တစ်ခု ဖြစ်လာပါက ပန်းချီဆရာများအတွက် အဆင်ပြေလာနိုင်ကြောင်း ပြောပြသည်။

 

“ဒီလိုလုပ်ငန်းတွေ ပေါ်လာတာ ပန်းချီဆရာရဲ့ စိတ်ကြိုက် ဈေးနှုန်းရရင် အဆင်ပြေပါတယ်။ ဈေးကွက်ရဲ့ လိုအပ်ချက်ကို ဖြည့်ဆည်းပေးနိုင်ရင် ပန်းချီဆရာတွေ အနေနဲ့ ၀မ်းသာစရာပေါ့” ဟု ပန်းချီဆရာ ငြိမ်းချမ်းဆုက ဆိုသည်။

 

ပိုင်ပိုင်(မြစ်မခ)

မန္တလေးအလင်း

စက်တင်ဘာ ၂၃ ရက်၊ ၂၀၁၁ ခုနှစ်